Home

De Trappenhuus is Tüüg

12. September 2021

Well kennt dat neet , de leve Naberske, de all vörher all`ns wusst un sehn hett un dat dorbi mit de Wohrheit neet so genau nimmt.
De hörn Nös alltied in fremde Angelegenheiten stopt, de Mitbewohners overwacht un dat doch eegentlich alltied blot good meent.
In`t Trappenhuus van de Wohnblock " Goethestraat" 11 kummt keen Mieter an Käthe Buchholz vörbi. Se hett all`ns heel besünners in`t Oog un somit ok all`ns in Greep. Gau hett Se rutkregen,dat siet einige Weeken bi Gesine Schmiedenpenning een Türke in un ut geiht un mennigmal ok over Nacht blivt. Tosamen mit de anner Mieterin Anna Käsebrecht word nu heel genau recherchiert wat dor mit de beiden so löpt. Butendem mutt Käthe ok noch to weeten kriegen, wat dat mit de neije Mieter Volker Koch up sük hett. Ok de Ehekrach van Stefanie Liebermann un hörn Mann Uwe hett se all lang mitkregen un se gifft sük nu düchtig Meite disse Verbindung heel un dall to trennen. Un dann is da noch de düchtig demente Herr Winkelmann de van Käthe plegt word.

Dat Käthe Buchholz sük mit hörn Getratsche un Intrigen up de Düür in dat Mietshuus heel besünners unbeliebt makt, daran mag se heelneet denken.

De Spöldeel Transvaal hett för disse Komödie weer een tolle Klottje up de Bühne stellt. Wi garanteern, dat bi disse Upföhrens keen Oog drög blivt un dat Ji een wunnerboren Theateravend verwachten könnt.

Völ Pläseer bi "Dat Trappenhuus is Tüüg"